Расія засяродзіла значныя сілы каля Данецкай вобласці і рыхтуецца да маштабнага наступлення, паведамляе Інстытут вывучэння вайны (ISW) у новай справаздачы, аб чым піша УНІАН.
«Расійскія войскі пашыраюць свой плацдарм на паўночным усходзе ад Лімана ў рамках узаемазвязаных намаганняў па стварэнні ўмоў для захопу Баравой і Лімана ў бліжэйшыя месяцы», — гаворыцца ў дакладзе.
Амерыканскія аналітыкі адзначаюць, што расійскае камандаванне тактыкай «чалавечых хваляў» спрабуе выцесніць украінскія сілы з левых берагоў ракі Жарабец. Адначасова адсутнасць механізаваных атак сведчыць аб праблемах акупантаў з тэхнікай.
Акупанты прасунуліся на паўночны захад ад Навалюбаўкі і, верагодна, захапілі гэты населены пункт. Акрамя таго, аналітыкі пацвердзілі прасоўванне на паўднёвы ўсход ад Новага.
Затое ўкраінскія крыніцы фіксуюць рух акупантаў да паўднёвай ускраіны Кацярынаўкі. З пачатку года расіяне ўзмацнілі пяхотныя атакі, рэдка выкарыстоўваючы бронетэхніку.
Паводле звестак ISW, на асобных участках суадносіны сіл дасягаюць 10:1 на карысць РФ. Асноўную ўдарную сілу складаюць 144-я і 3-я мотастралковыя дывізіі. Пры гэтым акупанты актыўна папаўняюць страты, не выводзячы падраздзяленняў на адпачынак.
На думку аналітыкаў, акупанты могуць выкарыстоўваць свой плацдарм на паўночным усходзе ад Лімана, каб захапіць адзін працэнт Луганскай вобласці, што застаецца пад кантролем Украіны. Гэта трэба Расіі для ўзмацнення пазіцый за сталом перамоў.
Прэзідэнт Украіны Уладзімір Зяленскі заявіў, што Расія рыхтуецца да наступлення яшчэ на дзве ўкраінскія вобласці — Сумскую і Харкаўскую — і для гэтага спрабуе выйграць час. Паводле звестак Зяленскага, наступленне рыхтуецца вясной, што пацвярджаюць дадзеныя разведкі.
Раней паведамлялася, што новае наступленне ў Сумскай і Харкаўскай абласцях крамлёўскі дыктатар Уладзімір Пуцін хацеў пачаць яшчэ восем месяцаў таму. Аднак яго планы скарэктавала спецаперацыя УСУ ў Курскай вобласці РФ.
нг